पोखरा । शिक्षा तालिम केन्द्र गण्डकी प्रदेश तनहुँले शिक्षकहरुका लागि अनलाइनबाटै तालिम दिन सुरु गरेको छ । विद्यालय क्षेत्र विकास कार्यक्रम (SSDP) अन्तर्गत माध्यमिक तथा आधारभूत तहका (६-८) अङ्ग्रेजी, गणित, विज्ञान र सूचना प्रविधि विषयमा ३५० जना शिक्षकहरूलाई भर्चुअल तालिम दिन सुरु गरेको हो ।
तालिम प्रमुख नेपालहरि रानाभाटको अध्यक्षतामा बुधबार भएको उद्घाटन सत्रमा प्रमुख अतिथि शिक्षा तथा मानव स्रोत विकास केन्द्रका महानिर्देशक तुलसीप्रसाद थपलियाले अनलाइन तालिमको औचित्यमाथि प्रकाश पार्दै विद्यालय सञ्चालनमा प्रविधिको प्रयोगको आवश्यकतालाई परिपूर्ति गर्न यो तालिमले महत्वपूर्ण भूमिका निर्वाह गर्ने विचार व्यक्त गरे । कार्यक्रममा प्राविधिक सहयोगको लागि रोष्टर प्रशिक्षकको रूपमा श्रीकान्त पौडेल, लक्ष्मण आचार्य, श्रीकृष्ण आचार्य, केशव घिमिरे र तालिम केन्द्रका प्रशिक्षक अनिषा यादव, राजकुमार विष्ट र दामोदर कार्की समेतको सहभागिता रहेको थियो ।
शाखा अधिकृत विदुरहरि आचार्यको सञ्चालनमा भएको कार्यक्रममा शाखा अधिकृत प्रकाश देवकोटाले स्वागत गरेका थिए। तालिम २८ गतेसम्म सञ्चालन हुने तालिम केन्द्रले जनाएको छ ।